Шинэ цолтнуудын тухайд хувийн бодлоо хуваалцахуй...

Улсын бүхий л цолтон төрөн гарсан наадам гэж хэлж болох. Бөхчүүдийн бүтэн жилийн хөдөлмөрийн үр дүнгээ үзсэн, ард олноо баясган цэнгүүлсэн, ирэх наадмыг хүртэл хуучлах сэдвийг үлдээсэн Наадам сайхан болж өндөрлөлөө... Шинэ цолтнуудын тухайд хувийн бодлоо хуваалцахул: 

Улсын начин Төрөөгийн Баасанхүү: Уран, дайчин, салхитай барилдаантай бөх. Өмнөх жилийн нэгэн адил багшаараа 3 давж, дөрвийн нугараанд Ганбаатар гардитай дахин таарав. Даагаа нэхсэн барилдаанд ур ухаан гаргаж даваа авснаар НАЧИН цолонд хүрэх эрхээ өвөртөлсөн. Нутгийн арслангаар начны давааг алхаж, нутгийн аваргадаа унасан. Дэмжлэг, татаас авсан ч цолондоо багадахгүй бөх. Магадгүй аварга амлаагүй бол харцага болоод зааны даваанд ч босож мэдэх л бөх...

Улсын начин Лувсандоржийн ЦЭРЭНТОГТОХ: Начнаар тогтохгүй бөх дөө. Сайхан барилдаан хийсэн. Бат-Орших харцагатай тун ухаалаг барилдсан ч, харцагын даваанд хариуцлагагүй барилдааныг үзүүлсэн. Сайхан начин. 

Улсын харцага Энхтөгсийн Оюунболд: Санги начин, Ганхуяг арслан, Санчир заан гээд Өврийн хангайн хүчтэнүүдийг дараалан өвдөглүүлж зааны даваанд босов... Ямар ч бөхтэй барилдсан өөрийн хүссэнээ хийж чаддаг, сэтгэл зүйн хувьд бэргэсэн, дутуу байдлыг үзүүлдэггүй дайчин бөх. Нутгийн ойдоо том бэлэг барилаа. Олон ч жил барилдана даа... Сумогоор бол Кисэносато гэж хэлж болох юм. 

Улсын харцага Намсрайжавын Батсуурь: Удамт бөх. Харцагаар ч тогтохгүй барилдах боломжтой байсан. Батмөнх илүү нягт байлаа. Хоёр жил дараалан нутгийн арслан цолтой бөхчүүдтэй нугарав. Ухаалаг барилдааныг үзүүлсэн. Ирэх жил ч түүнд цолоо нэмэх, батлах боломж бий...  

Улсын харцага Найдангийн Түвшинбаяр: Төрийн наадмын дэвжээнд 4 давж начны даваанд боссон, дөрвийн нугараанд шилдэг залуу харцагад тасдуулж байсан түүх бол түүнд бий... Цолонд хүрэх боломжтой залуусын нэрсийн жагсаалтад би хувьдаа түүний нэрийг оруулаагүй юм даг. Ганцхан барилдаан л хийлээ. Хоёрын даваанд бяртай бөх аймгийн арслан Д.Энхбатыг ирэх наадмыг хүлээхэд хүргэснээр өөрийн замыг нээсэн гэх үү дээ. Харцагын энтэй барилдааныг хойшид үзүүлж чадах эсэхийг нь харах л үлдлээ... 

Улсын заан Батзоригийн Батмөнх: Бэлтгэл онцгой сайн байсан. Гурав дээр 13 бөхөөс Чулуунбатыг амласан нь түүнийг бэлтгэл сайн байгааг, дээшээ өгсөж барилдах нөөцтэй байгааг тодорхой харуулсан... Содном, Санжаа, Батсуурь гээд хүчтэй өрсөлдөгчидтэй тун ч ухаалаг барилдсан. Гардийн даваанд уг нь санаачлагатай байсан ч... Сайхан заан төрлөө. 

Улсын гарди Батнасангийн ГОНЧИГДАМБА: Завхан нутгаас 71 жилийн дараа төрийн наадмын түрүү булаалдав. Цолонд хүрснээсээ хойш тогтмол бэлтгэлтэй, жигд сайхан барилдааныг үзүүлж байсан шилдэг бөх. Лав заан цолонд хүрэх бүрэн боломж түүнд байсан. Тун ухаалаг, мэдрэмжтэй, даацтай мэхийг үзүүлж барилдав. Одоо түүнд илүү их боломж гарч байгаа тул ирэх наадмуудад том цолны төлөө, цолоо хамгаалж сайхан барилдах буй за... Илүү амжилт.

Улсын Аварга Гунаажавын ЭРХЭМБАЯР: Ардын хувьсгалын өлгий нутгийн анхны Аварга... Арслан цолонд хүрснээсээ хойш мөн л жигд сайхан барилдаж байсан бөх. Энэ жил түүний хувьд түрүү булаалдах сүүлийн боломж ч байсан байж мэдэх. Харин өөрийнх нь хувьд түрүүлэх хэмжээний өрсөлдөөнийг үзүүлж чадах бүрэн боломж байсан. Нягт, ухаалаг, сайхан барилдааныг үзүүлсэн. Сайхан аварга. Монгол бөхийн зүлэг ногоон дэвжээ түүнд хайр ивгээлээ өглөө. Харин одоо дахиад ч түрүүлэх хэмжээний өрсөлдөөнийг үзүүлэх боломж гарч ирлээ. Жудагтай, төлөв түвшин сайхан бөх...