Т.Мөнхтуяа ДАШТ-ний 10 дахь медалийг эх орондоо авчирч чадлаа

Эмэгтэйчүүдийн чөлөөт барилдааны 23 дахь удаагийн ДАШТ 27-29-нд Канадын Страткона хотноо болж буй билээ.

59кг-ын жинд зодоглосон “Хангарьд” клубын тамирчин, ОУХМ Тунгалагийн Мөнхтуяа хүрэл медалийн эзэн болж эмэгтэйчүүдийн ДАШТ-ний медалийн буухиаг үргэлжлүүллээ. 

Манай бөх эхний тойрогт Канадын бөх Мишель Фаззариг 1:0, 0:1, 3:1 оноогоор., 2-р тойрогт АНУ-ын бөх Лейф Эвелин Жейнсийг 3:0, 0:1, 3:1 оноогоор тус тус хожиж, улмаар мөнгөн медалийн төлөөх барилдаанд Беларусийн бөх Залина Сидаковатай таарч 0:2, 0:1 оноогоор хожигдов.

Хүрэл медалийн төлөөх барилдаанд Энэтхэгийн тамирчин Шеоран Шилпиг 2-р үед цэвэр ялснаар медалийн давцанд зогсож, Монголын чөлөөт барилдааны эмэгтэйчүүдийн ДАШТ-ний 10 дахь медалийг эх орондоо авчирсан бас нэгэн содон амжилтын эзэн болов оо...

/Тод: Алтан медаль 1 (С.Батцэцэг-2010), мөнгөн медаль 3 (О.Бурмаа-2009, Д.Отгонцэцэг-2011, Б.Оюунсүрэн-2011), хүрэл медаль 5 (Ц.Энхжаргал-2005, Д.Нармандах-2007, О.Насанбурмаа-2008, 2011, Т.Одончимэг-2010)/

11 дэх удаагийнхаа ДАШТ-д оролцож буй

манай эмэгтэй баг тамирчдын бүрэлдэхүүн:

48 кг Б.Даваасүрэн: Залуучуудын ДАШТ-ний мөнгөн медальт, ДАШТ-д анх удаа оролцож байна. /“Хангарьд” клуб/

51 кг Д.Отгонцэцэг: 2011 оны ДАШТ-ний мөнгөн медальт, ДАШТ-д 5 дахь удаа оролцож байна. /“Мега-Старс” клуб/
55 кг Б.Номин-Эрдэнэ: ДАШТ-д 2 дахь удаагаа оролцож байна. /“Хангарьд” клуб/

59 кг Т.Мөнхтуяа: ДАШТ-д анх удаагаа оролцож байна. /“Аварга” биеийн тамирын дээд сургууль/

63 кг О.Насанбурмаа: ДАШТ-ний хошой хүрэл медальт, ДАШТ-д 6 дахь удаагаа оролцож байна. /“Хүч” спорт хороо/

67 кг Ц.Баярзаяа: ДАШТ-д 2 дахь удаагаа оролцож байна. /“Мега-Старс” клуб/

72 кг Б.Одончимэг: ДАШТ-ий хүрэл медальт, ДАШТ-д 6 удаагаа оролцож байна. /“Алдар” спорт хороо/

ДАШТ-ний хүрэл медальт, ОУХМ Тунгалагийн Мөнхтуяа:

1988 онд Булган аймгийн Тэшиг суманд төрсөн. 2011 онд АБТДС-ийг төгссөн. 2008 оноос Эрдэнэт хотын “Хангарьд” клубт дасгалжуулагч Ч.Раднаабазарын удирдлага дор чөлөөт бөхийн спортоор хичээллэж эхэлсэн, одоо “Аварга” биеийн тамирын дээд сургуульд Л.Бадарчийн удирдлага дор бэлтгэл сургуулилтаа хийж байна.

2012 онд үндэсний шигшээ багийн тамирчин болсон. 2012 онд спортын мастер, олон улсын хэмжээний мастер цол хүртжээ.

Бүх ард түмний спортын XIII наадамд алт, УАШТ-ээс хүрэл медаль хүртээд байна. 2012 онд ОХУ-ын Красноярск хотноо болдог И.Ярыгиний нэрэмжит Гран-При тэмцээнээс хүрэл медаль, “Mongolia Open-2012” олон улсын тэмцээнээс мөнгөн медаль тус тус хүртсэн.